يا والله ملاّ حكومهْ! * شعر زهورالعربي

يا والله ملاّ حكومهْ

داهمةعَ جبل بقادومهْ

تصبّر فينا بالأوهامْ

تاكل وتبغْنق علينا

وتقولِلْنا الحالة شينهْ

.......

يا والله ملاّ حكومهْ

لاحكمهْ ولا راس يدبّر

ولافارس للحرب مجرّبْ

ولا من ينسى شويّ روحَهْ

كان المنجل ياكل فينا

......

يا والله ملاّ حكومة

حكومة تُحكم بحكايمها

لا روف ولا حنانهْ علينا

والشّعب يقانص في الخبزهْ

وحاير في امرو يتغبّنْ

م الهمْ الّي بركْ علينا

......

ياوالله ملاّ حكومهْ

لا خبرة ولا شيخ يدبّر

الرّاس تعرّى وغرقنا

في ديونْ البرّة ولْداخل

ويا وخيّاني هيّا نْثورو

ضعنا وضاعت ذْرارينا

......

يا والله ملاّ حكومهْ

حكومة ورا حْكومهْ

ورا ااااااا.....حْكومة

تاكل في لَخْضر ولْيَابس

تعويضات على النّضال

ووزْرة ونوّابْ بلا عددْ

ترافيك وتهريب سْلعْ

بَركات الثورة الزّينهْ

..........

يا والله ملاّ حكومهْ

دواءْ مسمومْ وموتْ ولدانْ

وكردونة زادت الوجيعهْ

في قلب اميمة محروقهْ

تدفن في وليدها وحدها

وصدرْها بحليبو يشخّبْ

يا والله ملاّ غبيييييينهْ

* شعر زهورالعربي