وْصِيَّةْ قصيدة للشاعر التونسي قليعي بوخاري

وْصِيَّةْ

سْمَعْتْ الْكِلاَمْ عْجِبْنِي

وْ مِتْفَهّْمِكْ يا ابْنِي

وْ هَاذَا كْلاَمْ كْبِيرْ

يَحْمِلْ بَشَايِرْ خِيرْ

وْ نَا الْعُمْرْ صَارْ قْصِيرْ

اسْمَعْ وْ ماَ تْعَانِدْنِي

***

يَا حْمَدْ يَا مَضْنُونِي

وْ يَا ضَوْ شَعْشَعْ مِنْ فُصُوصْ عْيُونِي

كَانْ مُتِتْ ودْفِنْتُونِي

أُوزِنْ خُطَاكْ وْ سِيرْ

ما عُدْتْ وِلْدِي صْغِيرْ

وْاسْنِدْ خُوَاتِكْ بَعْدِي

وْ اعْمِلْ مَعَاهُمْ خِيرْ

***

خُوذْ الْوِصِيَّةْ و اسْمعْ

وْ لاَ تْقُولْ بَابَا في الحياة يّوَدَّعْ

وْ لاَ نْحِبْ عِينِيكْ تِغلْبِكْ وِدَّمَّعْ

نْحِبِّكْ حْجَرْ صَوّانْ مَا يِتْصَدَّعْ

رَاهِي الْحَيَاةْ بْكُلْهَا تْغَصْوِيرْ

وْ لاَ كُنْتْ وِلْدِي فِي كْلاَمي تَّبَّعْ

تِلْقَى طْريقِكْ سَاهْلَهْ فِي الْخِيرْ

نَعْرِفْ ثْقِيلْ عْلِيكْ حِملي بَعْدِي

لَكِنْ تِلَقَّى الْحِمْلْ انْتَ وِلْدِي

رَاهُو الْوِلَدْ في بلاَدْنَا دَايِمْ يِكُونْ سْنَدْ

أُمِّكْ جْنَاينْ وِدّْ

بْلاَدِكْ مَزَارِعْ وَرْدْ

لاَ تْسِيبْهُمْ لِلْغِيرْ

قليعي بوخاري07-02-2021