نسكت خير للشاعرة التونسيّة الأستاذة رفيعة بوذينة

من غيرْ ما تتكلّمْ

آشْ يفيدْ لكْلامْ

ومن غيرْ ما تتبسّمْ

وتْبيعْلي أوْهامْ

ولا تمدّ إيدْ تسلّمْ

ما ينفعْ فيها سْلامْ

حْكاية وهرْبتْ بينَا

عْلى كْفوفْ رقْص الرّيحْ

نوّارَة بين ايدينَا

لا تذْبل ولا تْشيحْ

نْضوّي ظلامْ ضلوعكْ

وتهزّني كي نْطيحْ

حكاية وراحتْ منّا

يزّينا من الملامْ

من غيرْ ما تتكلّمْ

آشْ يفيدْ لكْلامْ..

حلْمة جْوانحْها خضْرا

ذابتْ بينا في اللّيلْ

سكْنتْ بينا القمْرا

ضحْكاتْ ومْواويلْ

جنّة أنا شجرتْها

وانت عليّ تْميلْ

حلْمة تسرقتْ منّا

تخطْفتْ مع ليّامْ

من غيرْ ما تتكلّمْ

آشْ يفيدْ لكْلامْ..

حِلْمة ما حْميناهَا

ضاعتْ من بين ايدينا

للبرْد خلّيناها

غْدرْنا ضحكتْها الزّينَة

مْشينا ونْسيناهَا

وتاهتْ بعيدْ علينا

لثْنينْ هَدّيناها

وطارتْ ريشْ حْمامْ

من غيرْ ما تتكلّمْ

آشْ يفيدْ لكْلامْ..

زايد عليك تتكلّم

وتحيّر فِلِّي غايبْ

ومن غير ما تتبسّم

الضّحك ليه سْبايبْ

على شكون باش تسلّم؟

غابت جميع المراكبْ

ولفّْها الغْمامْ !!.