من روايتها {عشرة دقايق تكفي} كتبت رفيعة بوذينة

الصُوت هذا نعرفو ..

الصُوت هذا مزروع في قلبي ..

الصُوت هذا نابـِت في الجْواجي ..

يسري مع الدم في العروق ..

هو الي يعطي فيا في الاكسيجين عندو سنين ...

غاب ، وتوة رجعْ ..

وحتى كي غاب قعَدت نعيش بلـِي خِزنُو المخْ و خبَاه البدنْ ...

أما أنا في بالي كريم غايب ..

كريم مريض...

كريم ماخذ جمعة كونجي ..

ما ينجمش يكون هو ...قرُبت للكرهبة ، حتى الكرهبة ما نعرفهاشْ ما كانتش كرهبتو ..

.

زدت قرُِِّبت ....

الدنيا محْسوب مُغرب والطقس مسَحب ، آخر شتاء وبداية ربيع ..

كل شيء مفـَرعس و مـْخلبزْ كحاتي يا Raff ..

ما نجمت نثبتْ ونعرف شكون كان ما وصلت للكرهبة .

يمكن كرهبة مـرتوُ الي جاء بيها وقتها ..

من نص الشباك المحلول نلقى كريم ...

اللحية بالشِيب كالعادة ، هالأيامات منيش قاعدة نثبت فيه ، مالأحداث إلي صايرة ، وتعيش فيها البلاد .

.

ما نعرفش علاشْ وقتها قعَدت نُخزرلوُ بعينينْ أيامات الحامة يا Raff.

لابس ال ray ban متاعو زايدة فيه الشطر ، يضحك ، هكا المَضحك الجُوهر الِي تعرفوُ ، و un pull bleu marine قداشْ محليهْ .

المهم ، تفجعت وفرحت في نفس الوقت ...

.

تعرف يا Raff هكا الفرحة الي تجيك على غفلة . عصابك الكُلها تترخف وتحب تبكي .

.

هكا الحاجة إلي سنين تتمنى فيها وتستنى فيها ، وتجيك في وقت انتِ ماكش تخمم فيها .

تعرف وقتها آش تذكرت يا Raff أختي ؟

تذكرت كي كريم يكْري كرهبة في حامة قابس ويجيني في الصعدة متع حمام الصغَيْر ويقعد يستناني باش نزربْ نرْكبْ وما يرانا حتى حد ...

نبداو خايفين ، البلاد صغيرة والعقلية ، عقلية جنوب ، الناس الكل تعرف بعضها .

.

والأستاذ وإلا الأستاذة الي تجي جديدة يسَلطوا عليها الأضواء ، ويقعدوا مدة يعسُوا عليها .

كان رضاوْا عليها ، اطوِلْ بيناتهم ، كان ما رضاوشْ عليها ، ويلقاوها بعيدة على عقليتهم ، ما تفيق كان باستدعاء مالمُعتمد ...

.

نرجعلك لكريم يا Raff ، ما نعرفش علاش مخي رجع للحكايات هذي الكلْ ...!!!

قتلك تفكرت في اللحظة هذيكا قداشْ نبداوْا خايفين لا يراونا التلامذة...

وتحكي علينا العباد ..

.

يقلي اطلع فيسع منتالي، نخاف عليك لا يراوك ..

يقعدوا يحكيو بيك في القهاوي والجوامع ..

عقلية مزالت محافظة والخبر يـوَلي قصة ..

والقِصة تولي غُصَة مناش ناقصين عزيزتي .

نركب أنا من تالي ونبدى شايخة ، كيفاش كريم فكر فيا أكثر ملي أنا نفكر في روحي

يخاف عليا أكثر ملي أنا نخاف على روحي ..

يحمي فيا أكثر ملي أنا نحمي روحي ..

وقتها يا Raff هو بيـدُو حس بالاحساس هذاكا .

تعرف آش قلي ؟؟

.

قلي هيا فين نمشيوْ سونة واحة شـِنني والا hotel oasis ؟

.

دمعتي سبقت جوابي وطاحوا الأوراق من يدي .

دخلت بعضي وقتلوُ :

" والله حرام عليك " ...وشْرقت بدموعي .