كذاب من يڨول الساسة عندهم دين قصيدة عامية للشاعرة التونسية المتألقة حنان العلوي

كذاب من يڨول الساسة عندهم دين

وكذاب من يڨول مسلمين

وكذاب الي يصدڨهم مرتين

كذاب الي يڨول ليهم ملة

منازيس بأوجاعنا تتسلى

عل الڨلب زادو أمراض فوڨ العلة

ونحنا عليهم الكل مجبورين

وڨت الشدايد ماعاد ليهم طلة

ووڨت المصالح يواجبو في الحين

وڨت الشدايد ذابو

لاعاد فيهم من يشوف أحبابو

والي تتعنى بيه يسكر بابو

تڨول صدمو عليه متسولين

واذا حكيت معاه شين جوابو

أصل الساسة الكل كذابين

وڨت المصالح يهلو

يولو عليك ينشدو ويطلو

وكل حد يڨول أطلبو وآتمنو

ونحنا هنا في الخدمة موجودين

وتوفا المصالح ماعاد ليك يولو

كي تموت انت وناسك مجمولين

عشڨو الكراسي وعبدو

والشعب يڨاسي طلعولو ڨلبو

من يوم هلو زاد همو وغلبو

وهوما وين ؟؟ في المجلس متخاصمين

الشيخ و المخلوف وحتى عبو

كل واحد يڨول مامنيش آثنين

في المجلس عملو الريحة

عرك وشباط وكل لحظة فضيحة

لا فما واحد ماكلاش طريحة

بين خلڨ ربي صارو منعوتين

اسمعو كلامي وخوذو مني نصيحة

اخطو السياسة راكم مفضوحين

خوذو النصيحة وريضو

راو حالكم يسخف والله العظيم تغيضو

مثيل الخميرة ماشين وتفيضو

ظاهر عليكم الخير متهنين

والي يڨول منين هذا تهيضو

تڨولش عليه كفر سب الدين

الي سأل مشى

والي سكت حمل مواجعو في الردى

من يوم طلع البدر ولينا جااااا

ڨعدنا رهينة في الهم غرڨانين

أعوام سودة لا ڨمر فيها ضواااا

لا رينا فرحة تو عشرة سنين

حنان العلوي