السماء السّابعة للشاعر التونسي المتميز عماد الزغلامي

(لهجة دارجة)

مُحــــــتاجْ نظْرةْ وِدّْ بيها نعيشْ

مُحتاجْ لمْسةْ عَطْفْ تبري العِلّهْ

محْــــــتاجْ قلبْ كْبيرْ ما يكافيشْ

ولا يذلّني باحْــساسْ فيه مْذلّهْ

محــــــتاجْ حُضْن دْفا فيه الرّيشْ

والبرْد رغْــــــــم شْتاهْ ما يوصلَّهْ

يا عينْ وسْط اللّيلْ ما تخافيشْ

ولا تصْهري لا تشغْشِبَكْشِ الطلَّهْ

ولا تدْمعي عْلى ناس ما عرفتيشْ

ولا تحزني عْلى حْمامْ طار تـْعَلَّهْ

نحساب همِّ الدّهْر ما يجينيشْ

ونحسابْ روحي مْلكْت فرْحي بكُلّهْ

ونحساب خِلّي صْفا ما يعاديشْ

ونحساب بابو فْ كُلْ وقْت نْحِلّهْ

ونحساب بدري عْلا ما يوطّيشْ

ولا تهبّطو لرْياحْ لا تكمْلَّهْ

والحظّْ بيّهْ دار ما عطانيشْ

والكارطهْ مرْغوبْها تتْسَلّهْ

يا حْياةْ لوْ نا تْعِبْتْ ما تْلوميشْ

وسلِّمْتْ فيك جْهارْ صبْري لِلَّهْ

*** شعر : عماد الزغلامي ***