أيّام كنتِ ترعبي يا خضرا شعر محكي للشاعرة والروائيّة التونسية زهرة مراد

أَيَّامْ كُنْتِ تِرْعْبِي يَا خَضْرَا الْيُومْ قَصْرْ قَرْطَاجْ طَايِحْ قَدْرَه أَيَّامْ كَانْ قَصْرِكْ عَالِي وِالْفُوڨ عَالِيَه مَّالِيكْ كَانْ فِيكْ...وْفِيكْ... عَادِي. لَكِنْ صُيْودَه كَانْتْ تُحْرِسْ فِيكْ أَيَّامْ كَانْ الْقَصَرّْ... وْكَانْ زْمَانْ الْعِزّْ فِيكْ يَا بَيَّـه الْيُومْ خْنَافِيسْ وَلِّتْ نَحْلْ رْخُصّْ الْغَلَا وَالْعَالِي طَاحْ تْفَيَّ أَرْضِ الشَّرَفْ انْدَاسِتْ آهَ وِينُو زْمَانِكْ يَا الْغَالِيَه يَا الْبَيَّه أَيَّامْ كَانْ صِيتِكْ ذَايِعْ فِ الْغَرْبْ وِالشَّرْقْ مُوشْ شْوَيَّه كُنْتِ وِجْهِةِ السِّيَّاحْ مِنْ كُلّْ فَجّْ حِلْمْهُمْ يْعَدُّو فِيكْ صِيفِيَّه كُنْتِ وِجْهَه لِلْاسْيَادْ يِتْعَنُّولِكْ مِنْ كُلّْ فَيَّه بَحْرِكْ وْشَمْسِكْ حِلْمْ عْزِيزْ يْجُوهْ مِنْ كُلّْ بَرّْ وْثْنِيَّه الْيُومْ حَبُّو اسْمِكْ ضَايِعْ خَانُوكْ الْبَعْضْ مِ الذِّرِّيَّه طَاحْ قَدْرِكْ يَا الْغَالِيَه وَبَاعُو تْرَابِكْ... آهْ... مِ الدُّونِيَّه صَبْحِتْ ضْبُوعَه فِيكْ تِتْصَيِّدْ وِالسّْبَبْ الْفَاسِدْ مِ الذِّرِّيَّه وِينُو زْمَانِ الْعِزّْ فِيكْ يَا خَضْرَا أيَّامْ كَانْ الْغَرْبْ يَعْرِفْ كَارِكْ وكَانْ يَعْرِفْ مَعَاكِ حْدُودَه يْحَكَّرْ ويِحْسِبْ ألْف حْسَابْ لِرْجَالْ كَانِتْ فِيكْ صْيُودَه أيَّامْ رَايْتِكْ فِ السّْمَا تِتْلَالَى وَلَبْوَاتِكْ مِ الْعُرْبَانْ مَحْسُودَه الْيُومْ رَايْتِكْ هَانُوهَا يْحِبُّوهَا بِالسّْوَادْ تْوَلِّي الْبْنَاتْ فِ السَّوَادْ لَفُّوهَا يْرِيدُوهَا عَبْدَه لِلرّْجَالْ تْصَلِّي بِالْحُزْنْ ڤْلُوبْنَا عَبُّوهَا نَشْرُو الْجَهْلْ... وِالْفَقْرْ جْيُوبْنَا فَارْغَه رَدُّوهَا ذَبْحُو جْنُودِكْ... وْصْغَارْنَا اغْتَصْبُوهَا وْالْبَعْضْ كَلَاتُو النَّارْ فِي سُورِيّه الْاسْيَادْ اغْتَالُوهُمْ دَمّْهُمْ سَڤَاكْ يَا الْمِسْمِيَّه آهْ يَا زَمَانْ وَآآآآآآآآآآآآآآآهْ يَا الْخَضْرَا.. دُوْلْتِكْ خِرْبُوهَا التَّارِيخْ يِكْتِبْ فِي تْرَابْ الْبَيَّه دَمّْ الْغَوَالِي رَاوْ مُوشْ شْوَيَّه عَهْدْ عْلِينَا لَا نْبِيعِكْ لِيهِمْ... وْلَا عَلِيكْ نِتْخَلَّى وْبْرُوحْنَا نِفْدِيكْ يَا الْغَالِيَه يَا الْبَيَّه زهرة مراد قليبية 14 ماي 2014